ការគេងអោយបានត្រឹមត្រូវ និងគ្រប់គ្រាន់ គឺមានសារៈសំខាន់សម្រាប់ការលូតលាស់រាងកាយ និងសុខុមាលភាពរបស់កុមារ។ ស្វែងយល់ទាំងអស់គ្នាថាតើការគេងរបស់កុមារត្រូវការប៉ុន្មានម៉ោងដែលត្រឹមត្រូវ ហើយមានផលប៉ះពាល់អី្វខ្លះប្រសិនការគេងរបស់កុមារមិនបានគ្រប់គ្រាន់។

តើការគេងមានសារៈសំខាន់អី្វខ្លះ?

សម្រាប់រាងកាយដែលកំពុងលូតលាស់ ការគេង គឺមានសារៈសំខាន់ ដូចអាហារូបត្ថម្ភដែលផ្តល់អោយកុមារ និងការហាត់ប្រាណផងដែរ។ 

ការគេង មានសារសំខាន់សម្រាប់សុខភាព ការអភិវឌ្ឍ និងសុខុមាលភាពរបស់កុមារ។ វាជួយឱ្យពួកគេមានសុខភាពល្អ រៀនពូកែ និងធើ្វកិច្ចការបានល្អនៅសាលា។ ការគេងលក់ស្កប់ស្កល់ ធ្វើអោយប្រសើរឡើងនូវមុខងារខួរក្បាល និងសុខភាពផ្លូវចិត្តរបស់កុមារ។

ក្មេងគ្រប់វ័យត្រូវការគេងឱ្យបានគ្រប់គ្រាន់ ដូច្នេះពួកគេអាចលេង រៀន និងផ្តោតអារម្មណ៍ធើ្វកិច្ចការរបស់ពួកគេនៅពេលថ្ងៃ។

ការគេងមិនបានគ្រប់គ្រាន់អាចជះឥទ្ធិពលយ៉ាងខ្លាំងដល់កុមារ ដូចជា អាកប្បកិរិយា និង​ខាងផ្លូវចិត្ត ។

តើកុមារត្រូវការគេងប៉ុន្មានម៉ោង?

ចំនួនម៉ោងនៃការគេង គឺខុសៗគ្នាទៅតាមអាយុរបស់ពួកគេ។ 

• 0-11 ខែ – កុមារត្រូវការគេង 14 ទៅ 18 ម៉ោងក្នុង១ថ្ងៃ
• 1-2 ឆ្នាំ – កុមារត្រូវការគេង 10 ទៅ 14 ម៉ោងក្នុង១ថ្ងៃ
• 3-5 ឆ្នាំ – កុមារត្រូវការគេង 10 ទៅ 13 ម៉ោងក្នុង១ថ្ងៃ
• 6-13 ឆ្នាំ – កុមារត្រូវការគេង 9 ទៅ 10 ម៉ោងក្នុង១ថ្ងៃ
• 14-18 ឆ្នាំ – កុមារត្រូវការគេង 8 ទៅ 9 ម៉ោងក្នុង១ថ្ងៃ

តើកុមារមានផលប៉ះពាល់អី្វខ្លះប្រសិនពួកគេគេងមិនបានគ្រប់គ្រាន់?

នៅពេលដែលកុមារគេងមិនបានគ្រប់គ្រាន់ក្នុងរយៈពេលណាមួយ រោគសញ្ញាអាកប្បកិរិយា ការយល់ដឹង និងផ្លូវចិត្ត ខាងក្រោមអាចកើតឡើង។

• ងងុយគេងពេលថ្ងៃ
• បញ្ហាជាមួយនឹងការសិក្សា និងសង្គម
• ឆាប់ខឹង និងអារម្មណ៍មិនល្អ
• ផ្គង់អារម្មណ៍រយៈពេលខ្លី
• ការភ្លេចភ្លាំងកើនឡើង
• ប៉ះពាល់ដល់ការរៀនសូត្រ
• កង្វះចំណាប់អារម្មណ៍ និងការលើកទឹកចិត្តខ្លួនឯង
• ការលំបាកក្នុងការរៀន និងចាប់យកព័ត៌មានថ្មីៗ
• លំបាកក្នុងការគ្រប់គ្រងអារម្មណ៍
• ចុះខ្សោយប្រព័ន្ធភាពស៊ាំ
• ការអត់ធ្មត់មានកំរិតទាប
• ភាពតានតឹងកើនឡើង
• សុខភាពផ្លូវចិត្តចុះខ្សោយ

វិធីសាស្រ្តជួយកុមារអោយមានទម្លាប់គេងល្អ

• ជួយជំរុញកុមារអោយហាត់ប្រាណទៀងទាត់
• បិទគ្រឿងអេឡេត្រូទិច​ ៣០នាទី មុនពេលចូលគេង
• និយាយជាមួយពួកគេអំពីការគេង និង គុណប្រយោជន៍នៃការគេងគ្រប់គ្រាន់ 
• ជួយកុមារគេងអោយបានគ្រប់គ្រងតាមអាយុរបស់កុមារ
• កំណត់ម៉ោងនៃការគេងរបស់កុមារ និងម៉ោងត្រូវក្រោក
• បង្កើតទម្លាប់មុនពេលចូលគេងឱ្យបានទៀងទាត់ ដូចជា ងូតទឹក ដុសធ្មេញ បន្ទាប់មកអាន ឬធ្វើសមាធិ
• បង្កើតបរិយាកាសក្នុងបន្ទប់គេងទៅតាមចំណូលចិត្ត ឬទម្លាប់របស់កុមារ (ងងឹត ត្រជាក់ ស្ងប់ស្ងាត់ និងគ្មានអេក្រង់)
• ជៀសវាងអាហារ និងភេសជ្ជៈដែលមានជាតិស្ករ 2-3 ម៉ោងមុនពេលចូលគេង ដើម្បីជួយឱ្យពួកគេសម្រាកបានស្រួល។